- prev
- next
Arkitektët janë të njohur zakonisht për projektimin e shtëpive të bukura - jo çfarë ka në to. Por projektimi i ndërtesave është diçka që arkitektët mund ta konsiderojnë më të lehtë sesa projektimin e mobiljeve. Dëshira për të dizajnuar objekte të përditshme në një mënyrë tepër të personalizuar dhe unike është një sfidë që disa prej arkitektëve kanë vendosur të marrin përsipër. Krahas shumë stilistëve të talentuar të mobiljeve në industri, shumë prej arkitektëve më të njohur në botë kanë lënë gjurmën e tyre në këtë fushë duke krijuar produkte ikonike që kanë bërë histori. Duke vështruar nga pikëpamja e strukturës, formës, estetikës, si dhe performancës, ne kemi zgjedhur disa nga mobiljet tona të preferuara për të përforcuar qasjen tuaj në dizajn:
Eileen Gray Furniture
1. Ludwig Mies van der Rohe – Karrige Barcelona
Krijimi i një orendie për shtresën e lartë në kohën kur shumë të tjerë po mendonin të krijonin gjëra për "njeriun e thjeshtë" ishte diçka që vetëm Ludwig Mies van der Rohe mund të bënte. Arkitekti besonte në një qasje dizajni pak-është-shumë. Në vitin 1929, kjo perspektivë e disiplinuar solli në jetë tashmë një klasik, karrigen Barcelona. Frymëzuar nga stolat e palosshëm të Egjiptit të lashtë dhe idealet moderne të dizajnit, linjat e thjeshta dhe forma tërheqëse e karriges e bëjnë atë një objekt të bukur dhe të rehatshëm.
2. Eero Saarinen - Tavolina Tulipan
Linjat fluide dhe thjeshtësia radikale e tavolionës Tulipan nga Eero Saarinen është bërë një nga modelet më të njohura të arkitektit finlandez-amerikan. Prezantuar në 1958, stili dhe forma pak futuristike e tavolinës Tulipan ndihmoi për të eleminuar atë që Saarinen e quante "slum of legs" që krijohet shpesh kur karriget shtyhen nën një tavolinë. Baza e piedestalit të kësaj tavoline ruan identitetin e saj estetik edhe kur karriget vendosen rreth saj.
3. Jean Prouvé - Karrige Cité
Jo shumë karrige mund të krenohen me një histori të njohur dizajni, por Cité është sigurisht pjesë e kësaj liste, dizajnuar nga Jean Prouvé, një arkitekt dhe dizajner francez autodidakt dhe përpunues metalesh. Ai projektoi karrigen Cité në 1930 si pjesë e një konkursi për të mobiluar sallat e studentëve në Cité Universitaire në Nancy. Struktura e saj dalluese është bërë prej çeliku të përkulur të veshur me një shtresë pluhuri. Karrigia është kaq komode sa u bë një nga objektet e preferuara të Jean Prouvé, i cili si pasojë zgjodhi ta kishte atë në shtëpinë e tij gjithashtu.
4. Gio Ponti - Pasqyrë muri
Gio Ponti ishte një arkitekt, artist dhe dizajner italian, i cili solli estetikën e tij moderne në ndërtesa, ambiente të brendshme dhe orendi, si dhe në modelimin e brendshëm, bazuar në besimin se secila pjesë e strukturës funksionon në harmoni. Modelet e mobiljeve që mbajnë firmën e Pontit, të tilla si karrigia e hijshme Superleggera ose koleksioni i tij elegant i pasqyrave sigurojnë një këndvështrim të ri mbi mobiljet tradicionale italiane dhe stilin e përzier me funksionalitetin. Gio Ponti ishte një konceptualist që gjithmonë vendoste vija midis arkitekturës dhe dizajnit të brendshëm. Dizajni i tij u ndikua nga la dolce vita; ai i inkurajoi të gjithë të përdorin dizajnin e mirë për të shijuar jetën në maksimum.
5. Alvar Aalto – Koleksioni L-leg
Në fund të viteve 1920, arkitekti dhe dizajneri Alvar Aalto filloi të eksperimentonte me lakimin e drurit. Një nga risitë më të zgjuara nga Alvar Aalto është “këmba L”, e patentuar në 1933. Aalto e konsideroi modelin e tij të këmbës L arritjen e tij më të madhe dhe madje e krahasoi atë me shpikjen e kolonës arkitektonike. Falë kësaj risie, këmbët mund të ngjiteshin drejtpërdrejt në një tavolinë, karrige apo stol.
6. Eileen Gray - Karrige Bibendum dhe Tavolina E-1027
Arkitekte irlandeze dhe njëkohesisht dizajnere e mobiljeve, Eileen Gray ishte një pioniere e Arkitekturës Moderne dhe Stilit Art Deco. Modelet e saj të mobiljeve me tuba prej çeliku, në atë kohë revolucionare, janë bërë klasike. Karrigia e butë prej lëkure dhe tuba çeliku Bibendum (e krijuar në vitin 1926) dhe tryeza elegante prej qelqi dhe tuba çeliku E-1027 (1927) tani janë po aq të njohura sa ikonat e dizajnit ndërkombëtar, si karriget klasike Grand Confort të Le Corbusier dhe Perriand.
7. Charles & Ray Eames – Karrige dhe stoli Eames
Karrige dhe stoli Eames bënë debutimin e tyre në televizionin kombëtar amerikan në 1956. Në atë kohë, nuk kishte asgjë të tillë - dhe ende nuk ka asgjë për ta barazuar me të sot. Kthesa moderne e çiftit Eames për një karrige klubi të shekullit të 19-të jo vetëm që i ka rezistuar kohës për më shumë se 50 vjet, por është bërë një nga modelet më të rëndësishme të mobiljeve të shekullit të 20-të. Kur po zhvillonin konceptin për karrigen, Charles shpjegoi se ai dhe e shoqja Ray dëshironin që ajo të kishte "pamjen e ngrohtë dhe pritëse të një dorashke të lojtarëve të baseball-it". Në këtë mënyrë edhe karrigia dhe stoli i këmbëve u konceptuan për t'i dhënë një komoditet mikpritës trupit.
8. Mario Bellini – Divani Camaleonda
Megjithëse i konceptuar disa dekada më parë, divani modular u bë me të vërtetë i famshëm në vitet '70. Krijimi i arkitektit dhe stilistit italian u bashkua me ndryshimin kulturor që po ndodhte në shtëpitë dhe ambientet e brendshme në ato kohë, ndërsa njerëzit kërkonin dizajne që u lejonin atyre fleksibilitet dhe një pamje të re futuriste. Nga të gjithë objektet që Bellini ka projektuar, "Camaleonda" është mbase më e mira për sa i përket ndjenjës së saj të lirisë falë modelit të saj radikal modular që u mundëson njerëzve një numër të pafund konfigurimesh të mundshme. Tani, 50 vjet pas dizajnimit të tij, B&B Italia ka filluar riprodhimin e divanit për të kënaqur të gjithë adhuruesit e dizajnit.
9. Vincenzo de Cotiis - Mobilje
Askush nuk bën papërsosmëri të përsosur, ashtu si arkitekti dhe artisti italian Vincenzo de Cotiis. Modelet e tij të mobiljeve me koncept të lartë duken më shumë si diçka e gërmuar nga një pallat i braktisur sesa panairet e dizajnit modern. Firma e De Cotiis është një qasje e kujdesshme për shtresëzimin e materialeve të zakonshme të shoqëruar me bronz të derdhur në argjend dhe mermer francez. Për arkitektin dhe stilistin Vincenzo De Cotiis, çdo krijim mishëron një qasje të shtresëzuar me kujdes midis të kaluarës dhe të tashmes. Ndërsa orenditë e tij janë me shkëlqim dhe plotësisht të freskëta, ato gjithashtu të japin idenë sikur janë zbuluar gjatë një gërmimi arkeologjik ose janë shpëtuar nga një anije e shkatërruar.
