Një Apartament Industrial Eklektik

I pozicionuar në një rezidencë në periferi të Tiranës, ky apartament nga Martini Design Studio gëzon një qetësi me cicërima, edhe pse nuk është në një ndërtesë njëfamiljare. Pishina që vizualisht aksesohet nga dritarja e dhomës së gatimit, ta shton këtë ndjesi.

Apartmenti ka nje shije eklektike, nuk i përket një stili të vetëm, ku elementët kryesorë janë ata industrialë, por që shoqërohen hareshëm me një paletë të guximshme ngjyrash, violë e të kuqe, ushtarake e mustardë, të kaltër e blu. Por jo vetëm!

Të gjithë këto elemente ndërthuren me trajta të pastra e minimale të kontureve nëpër mure, me mobilje e aksesorë pak më maksimaliste e të pasur në teksturë e dekor, siç është kolltuku i madh i lëkurës ngjyrë konjaku, kornizat e shumta të punuara me dru, ndriçuesat me baza të shkëlqyeshme metalike, por edhe pasuria e teksturës që sjellin në ambient letrat e murit.

Elementët me shije tipike industriale, si dollapi i madh prej metali të zi në hyrje, faqja e madhe e betonit ku mbështetet tv, ndriçuesi lëvizës ( basculant ) mbi tavolinën e bukës, shtrati metalik i fëmijës, tavolina metalike e punës, e shumë shumë dekore të shpërndarë nëpër shtëpi, bëjnë që kryefjala në këtë apartament nga Martini Design Studio të jetë "industriale".