NË VËMENDJE: MARCIO KOGAN

Marcio Kogan (lindur më 6 mars 1952, në San Paolo) është një arkitekt dhe prodhues filmash i njohur më së shumti për projektimin e shtëpive private dhe retail. Ai është drejtori themelues dhe mentori i ekipit të Studio MK27. Marcio u diplomua në 1976 nga Shkolla e Arkitekturës dhe Urbanistikës në Universitetin Mackenzie Presbyterian. Ai është një profesor i jashtëm në Politecnico di Milano dhe në Escola da Cidade ku fitoi edhe masterin e tij në arsim, shoqëri dhe kulturë. Marcio është autori i të gjitha projekteve të Studio Mk27 dhe një anëtar nderi i Institutit Amerikan të Arkitektëve (AIA) dhe i Këshillit MUBE dhe MASP.

I konsideruar si një nga arkitektët më të rëndësishëm bashkëkohorë të Brazilit, Marcio Kogan e filloi karrierën e tij si kineast deri në momentin kur xhiroi shfaqjen e tij të parë të gjatë në 1988, ku falimentoi dhe - për fatin tonë të mirë - iu desh të kënaqej me arkitekturën. Megjithatë krijimi i filmave ndikoi në arkitekturën e tij në shumë mënyra.

"Përmasat kinematografike të ekranit të gjerë, drita, emocioni i vazhdueshëm i kërkuar nga filmi, puna në ekip dhe ndoshta shumë gjëra të tjera kanë filtruar në shpirtin tim."

Projektet e Marcio Kogan karakterizohen nga niveli i lartë i detajeve, thjeshtësia, marrëdhëniet e forta ndërmjet ambientit brenda dhe jashtë, të fokusuara në komoditetin termik përmes qëndrueshmërisë pasive, përdorimin e vëllimeve të pastra dhe aplikimin e elementeve tradicionale siç janë mashrabiyas, si dhe nga planet e brendshme funksionale. Ai favorizon përdorimin e lëndëve të para të tilla si druri, betoni dhe guri. Pothuajse të gjitha projektet e tij përfshijnë referenca nga arkitektura moderne braziliane, për të cilën Kogan e ka deklaruar veten një adhurues të flaktë. Stili i tij është një riimagjinim i modernizmit brazilian me vëmendje ekstreme ndaj detajeve, vëllimeve të pastra dhe me një fokus në thjeshtësinë formale. Por, mbi të gjitha, ai është mëse i sigurt se një cotoletta alla milanese e shijshme është më e rëndësishme se arkitektura.

Shtëpia Toblerone (2011) & Shtëpia P (2012), San Paolo, Brazil

Në mesin e viteve 2000, studimet kryesore të studios mk27 u përqendruan në kompozimet hapësinore të kutive me dritare horizontale lineare dhe në dizajnin e fasadës në lidhje me thellësinë e hapjeve në planet e jashtme. Projektimi i volumit bëhet një mendim arkitektonik i bazuar në sipërfaqe që përcaktojnë një pastërti formale radikale për pjesën e jashtme. Hijezuesit veshin të gjithë fasadën, nga lart poshtë, dhe mund të hapen plotësisht, ndërsa kornizat dhe hapjet e dritareve janë të fshehura nën ekranet prej druri.

Projektuar gjashtë muaj para shtëpisë Toblerone (dhe përfundouar nëntë muaj më vonë), projekti P House kundërshton premisat e qartësisë dhe thjeshtësisë strukturore që janë bërë të rëndësishme për projektet e mëvonshme të mk27, që shprehin dimensionin kalimtar të kësaj periudhe. Ndërsa shtëpia Toblerone fillon një fazë të re me një dizajn arketipik rreth temës së racionalitetit strukturor, shtëpia P e mbyll periudhën e mëparshme me një hetim të virtytshëm në lidhje me mundësitë e strukturave komplekse me trarë dhe konsola që ‘magjikisht’ zhduken në tranzicionet e tyre të ndryshme.

P House

Toblerone House

Shtëpia Kub (2012), San Paolo, Brazil

Cube House është një lloj antiteze ndaj projekteve të mëparshme të studios mk27: në vend që të kërkojmë bukurinë në përmasa të lehta dhe të ulta, këtu ideja ishte të projektohej duke përdorur masën dhe peshën. Për më tepër, nuk ka asnjë "lojë" vëllimesh, por përkundrazi një monolit betoni me hapje në fasada, si rezultat i proceseve të reduktimit material. Cube House krijon një dialog me traditën e arkitekturës moderne të San Paulos - brutalizmi i arkitektëve të tillë si Paulo Mendes da Rocha dhe Vilanova Artigas. Por vrazhdësia radikale e viteve '60 këtu lundron në hapësira të buta që i japin përparësi, ndryshe nga projektet paraardhëse, kritereve të tilla si komoditeti, funksionaliteti dhe jetueshmëria. Përdorimi i betonit të papërpunuar dhe arkitektura e bërë nga blloqet masive në pjesën e jashtme mbeten të njëjta.

Vertical Itaim (2014), San Paolo, Brazil

Vertical Itaim është një godinë banimi vertikale e ndërtuar në lagjen Chacara Itaim dhe përmban 10 apartamente. Tipari kryesor i kësaj ndërtese janë panelet e lëvizshme prej druri të përdorur si hijëzues. Grilat prej druri janë mbuluar nga një ekran katror me vrima që u referohen mashrabiyas tradicionale arabe - ekranet e gdhendura të grilave që u përdorën për herë të parë në Brazil nga kolonizuesit portugezë. Grilat me vrima u lejojnë banorëve të kësaj ndërtese në San Paolo të kontrollojnë nivelin e dritës në hapësirat e tyre të jetesës gjatë ditës.  "Elementet prej druri kanë modele katrore të shpuara dhe nuk e bllokojnë erën, ashtu si mashrabiyas arabë," tha firma e Marcio Kogan. "Kjo zgjidhje rezulton në temperatura shumë më të këndshme".

Shtëpia në Xhungël (2015), Guarujá, San Paolo, Brazil

Plani i vendosjes së Shtëpisë në Xhungël konsideroi një hapësirë ekzistuese të pastruar më parë në qendër të ngastrës, e vendosur në mes të Pyllit Tropikal të Atlantikut në Guarujá, në bregdetin e San Paolos, dhe sintetizoi një studim se si të bashkojë dizajnin modern dhe bimësinë tropikale. Dizajni i peizazhit rikompozoi speciet vendase dhe terreni formoi organikisht kuvertën prej druri në katin e parë. Vëllimi kryesor ngrihet nga toka dhe duket sikur është i inkorporuar në topografi: shtëpia projektohet jashtë maleve, duke e prekur tokën vetëm në dy shtylla.

SP Penthouse (2015), San Paolo, Brazil

Një rrjet raftesh prej druri nga dyshemeja deri në tavan mbulon muret me lartësi të dyfishtë të këtij apartamenti luksoz në San Paolo. Prona e madhe është e ndarë në tre kate që shikojnë nga qyteti i Brazilit. Studio MK27 dhe Marcio Kogan e projektuan ambientin e brendshëm për klientë me një koleksion të gjerë arti dhe sendesh, kështu që ofroi shumë mundësi për t’i ekspozuar ato. Karakteristika më dramatike e penthouse është pikërisht në bibliotekën e nivelit të lartë, ku muret e larta janë të mbuluara nga lart-poshtë me një rrjet raftesh të gjitha të veshur në dru, përfshirë edhe tavanin.

Shtëpia Planare (2018), Porto Feliz, San Paolo, Brazil

Planar House është një ushtrim radikal në horizontalitet, aspekt i hulumtuar zakonisht në projektet e studios. Futur në mënyrë diskrete në pikën më të lartë të terrenit dhe duke favorizuar topografinë ekzistuese, prania e saj ndihet më fort në gjurmë sesa në mënyrë vëllimore. Një vijë e gjerë në një peizazh të hapur. Ky lloj integrimi në parcelë kërkonte kujdes dhe vëmendje me projektimin e tarracës, e cila është fasada e pestë e ndërtesës. Tarraca e gjelbër imiton lëndinën përreth si dhe kontribuon në komoditetin termik të shtëpisë.

Shtëpia në rërë (2019), Trancoso, Bahia, Brazil

Ka kufij, të tillë si oqeani, që shfaqen në sytë dhe shpirtin tonë si hapje të pakufishme. Kur përballet me këto elemente të fuqishëm natyral, arkitektura duhet gjithashtu të hapë vetveten dhe të projektojë drejt kufirit. Shtëpia në rërë, me pamjen e saj të jashtëzakonshme mbi Oqeanin Atlantik në verilindje të Brazilit, ndërmerr këtë sprovë. E zhytur brenda pyjeve tropikale që të çojnë në plazhin mahnitës të Itapororoca, shtëpia shpreh një eksperimentim autentik rreth shpërbërjes së arkitekturës në mjedisin e saj natyror. Programi funksional zvogëlohet në minimum dhe shtëpisë i mungojnë hapësirat e mbyllura që nuk janë rreptësisht të nevojshme (korridoret, sallat e hyrjes). Vëllimet qëndrojnë mbi një kuvertë druri drejtkëndëshe të zgjatur, pak të ngritur mbi tokë, pranë njëri-tjetrit, por pak të shkëputur.

Pine Tree Drive House, Miami Beach

Studio MK27 ka realizuar një rezidencë luksoze në Miami Beach, duke shfaqur një pishinë natyrore, ku banorët mund të notojnë me peshq, dhe një urë kalimi që gjarpëron në lartwsi. Ajo arrihet nga njw shteg i valëzuar 60 metra, i cili devijon si rampw nga rruga kryesore. Shtyllat e betonit ngrenë shtegun mbi ujë, ndërsa paretet e dushkut formojnë parmakun e tij. Të dy materialet shfaqen në të gjithë brendësinë e pronës gjithashtu. Vendkalimi siguron hyrjen në nivelin e sipërm të vendbanimit, ku ndodhet edhe hapësira kryesore e jetesës.

Source: studiomk27.com.br; dezeen.com