Kronos Agroturizëm

“Kronos Agroturizëm” pozicionohet në Guzaj, Shijak, Durrës, në një zonë me reliev të ndërthurur fushor-kodrinor. Ky variacion i relievit i jep zonës jo vetëm një peizazh fantastik, por gjithashtu potencial për zhvillimin e aktiviteteve të ndryshme në çdo stinë të vitit.

Koncepti i Kronos bazohet në ngritjen dhe zhvillimin e një biznesi që mbështetet në prodhimin vendas dhe promovon kulinarinë, produktet, dhe bukurinë natyrore të zonës.

Përballë një qasje të tillë, lind natyrshëm një linjë orientuese në procesin e dizenjimit të ambjenteve të brendshme drejt materialeve natyrore, ngjyrave të tokës, hapjes ndaj dritës dhe peizazhit natyror, si sfondin e përsosur mbi të cilin kompozohen ambjentet në interier.

Kështu, në zonën e restorantit kemi një dominancë në përdorimin e gurit natyror dhe ngjyrës jeshile, të kontrastuar në nivel dyshemeje nga përdorimi i gjeometrisë bardhë e zi.

Një element tjetër element kyç në hapësirën e restorantit është dhe banaku, i cili vihet në shërbim të lojës së kontrastit, me dimensionet dhe ngjyrën vishnje të tij.

Në katin e sipërm pozicionohen ambjentet akomoduese.

Korridori si element i lëvizjes horizontale shërben gjithashtu si një hapësirë lidhëse për dizajnin ndërmjet dy kateve me funksione të ndryshme, të lokalizuara në të njëjtin objekt.

Karakteri i dhomave i përshtatet konceptit të përgjithshëm të interierit; një linjë tradicionale mobiliesh prej druri natyror me një prekje të ekuilibruar ngjyrash.

Materialet, teksturat e ngjyrat natyrore janë ato të cilat përcaktojnë hapësirat e brendshme të Agroturizëm Kronos. Një prekje e ekuilibruar ngjyrash krijon kontrastin e nevojshëm për ti dhënë më shumë intensitet hapësirave të mëdha dhe për të nxjerrë në pah karakteristikat e elementëve të përdorur për të formësuar hapësirat.