- prev
- next
Pik Ark prezanton: Fragmente të Arkitekturës Shqiptare – Një event ekskluziv me arkitektët në Green Coast MGallery
“Fragmente të Arkitekturës Shqiptare” është më shumë se një libër, është një udhëtim nëpër projektet, zërat dhe historitë e arkitektëve shqiptarë, të cilët me punën e tyre ndërtojnë jo vetëm hapësira, por edhe një pasqyrë të kulturës dhe shoqërisë sonë në zhvillim.
Pas dy botimesh, kjo iniciativë ka treguar se arkitektura shqiptare ka shumë për të thënë – dhe shumë për të dhënë.
Këtë herë, rrëfimi u soll më pranë njerëzve që e krijuan. Në një drekë të ngrohtë e ekskluzive pranë Green Coast MGallery Hotel, Pikark bashkoi arkitektët pjesëmarrës në botim, bashkëpunëtorët e intervistave, si dhe ata që i dhanë jetë librit. Përtej faqeve të një libri, botimi i dytë krijon një hapësirë për të dëgjuar historitë, sfidat dhe frymëzimet e tyre, nëpërmjet intervistave.
Një takim për të bashkuar zëra
Qëllimi ishte i thjeshtë, por i fuqishëm: të krijohej një moment rrjetëzimi, bashkëbisedimi dhe forcimi të marrëdhënieve profesionale mes arkitektëve, si dhe eksplorimin e një prej projekteve më intrigues në fushën e turizmit – MGallery Hotel, një ndërtesë e spikatur për kompozimin arkitektonik, fasadën elegante dhe kujdesin ndaj detajeve, veçanërisht sistemit të vetratave element, kyç për godinat buzë bregdetit.
Fjala e autorëve
Në hapje, autorët e librit – Armand Vokshi,Blerta Vila Rizvanolli, dhe Nesila Hajdini – ndanë mendimet e tyre mbi rëndësinë e botimeve të tilla. Ata theksuan se si librat nuk janë vetëm arkiva projektesh, por ura bashkëpunimi, që forcojnë rolin e arkitektit dhe krijojnë sinergji të reja në një kohë kur shpesh vëmendja është e përqendruar vetëm tek emrat ndërkombëtarë.
“Fragmente” i jep zë arkitektëve të trevave shqiptare, duke sjellë një arkitekturë bashkëkohore, të menduar me kujdes dhe të lidhur ngushtë me kulturën tonë.
Partneriteti që e bën të mundur
Eventi nuk do të ishte i plotë pa mbështetjen e partnerëve. AluKönigStahl si partner kryesor, solli në vëmendje sistemin e vetratave Schüco të hotelit, të cilin arkitektët patën mundësinë ta eksploronin nga afër.
Përfaqesuesja e kompanisë, Letjana Spiro tregoi historinë 160-vjeçare të kompanisë dhe mënyrën se si ajo ka mbështetur arkitektët në realizimin e projekteve të tyre, si në Shqipëri, ashtu edhe në botë.
Një sy nga e ardhmja
Ngjarja shërbeu gjithashtu si një ftesë për të gjithë pjesëmarrësit që të bëhen pjesë e botimit të tretë, i cili pritet të sjellë risi dhe të shndërrohet në një zinxhir eventesh të dedikuara arkitekturës. Kësaj here, ekipit i bashkohet edhe arkitekti i njohur nga Maqedonia e Veriut, Besian Mehmeti.
Nga librat tek hapësirat e hotelit
Pjesëmarrësit shëtitën në disa prej hapësirave të hotelit, përfshirë një Junior Suite, duke parë nga afër detajet e arkitekturës. Më pas, drekimi në restorantin e hotelit u shndërrua në një vend ku u ndezën bisedat mbi bashkëpunimet e reja, sfidat dhe mundësitë e arkitekturës shqiptare.
Një mozaik që formëson identitetin
Ky event u kthye në një festë të arritjeve të arkitekturës shqiptare – fragmente të cilat, së bashku, po formësojnë identitetin e një arkitekture “Made in Albania”.
Jo thjesht një libër, jo vetëm një event – por një lëvizje që synon të forcojë zërin e arkitektëve shqiptarë dhe ta bëjë atë të dëgjohet më gjerë.
Partneret tanë
Partneri kryesor: AluKönigStahl
