LAST SUPPER

Karakteri i vendit është prezent e i mishëruar në zgjedhjen e materialeve dhe në organizimin e hapësirave kryesore. Si pasojë, është krijuar një kuzhinë e hapur dhe trasparente afër me hyrjen kryesore të ambientit, për ti vënë në dijeni klientet për freskinë e produkteve të përdorura, si dhe të gatuarit në moment të pjatave.

​Ka një larmi në përdorimin e paternave dhe ngjyrave në Interior. Ky fakt vihet re lehtë në përdorimin e drurit, brezave të paletave të ricikluara, imitimi i betonit në veshjen e mureve, pllakat gri dhe krem në prerje të vogël diku duke imituar stilin retro të mureve të metrove më të hershme europiane, e diku të trajtuara me motivin e kurrizpeshkut, që bëhet ‘leitmotiv’ në trajtimin e të gjithë hapësirës së brendshme.

Si për ti dhënë pak freski të gjithë atmosferës dhe konglomeratit të materialeve të mësipërme, një pjesë e mirë e mureve trajtohen në ngjyre bruzi (turquoise) të lehtë. Motivi i lartpërmendur i kurrizpeshkut mund të evidentohet kudo në mënyrën së si janë trajtuar dyshemeja (me nje parket shumë special Avatara), mënyra se si janë trajtuar muret e zonës së kuzhinës, si dhe hapësira e të gjithë Barit (pjesa e pijeve).

Në stil, qëllimi kryesor ishte të mbahej një balancë mes karakterit urban/industrial dhe karakterit më të orientuar drejt natyrës, duke përdorur elementë që ta zgjojnë në shqisa, idenë e saj si bimët e varura dhe Terrariumet e varura apo elementet me strukture metalike që imitojnë pemët e larta me ndriçues të varur nepër to.

Një vëmendje e veçantë i është dhënë elementëve të realizuar me dorë si ‘Terrariumet’ me kaktuse dhe sukulentë dhe shumë vëmendje iu është dhënë dhe trajtimit të hapësirave të tjera, si: hapësira e brendshme e kuzhinës, tualetet, një zyrë për qëllime menaxhimi në ambient, veranda dhe hapësira e veçantë për ushqim ‘take away’, në fasadën kryesore.