Shkolla 9-vjeçare "Lasgush Poradeci"

Përqasja konceptuale paraprake u realizua në vitin 2020 nga ASArchitects në kuadër të bashkëpunimit publik-privat dhe nismës së Bashkisë së Tiranës “Solidariteti për dëmet nga tërmeti”. Studio ASArchitects vazhdoi bashkëpunimin për realizimin e projektit final. Nismës iu bashkua Fondi i Zhvillimit të Katarit, i cili financoi të gjitha punimet e ndërtimit. Sfida në projektim dhe ndërtim ishte përfundimi i tij në një periudhë të shkurtër kohore.

Qëllimi i këtij projekti ishte rikonstruksioni i shkollës që ndodhet në Kombinat të Tiranës duke mbajtur të njëjtin funksionalitet si shkolla e mesme në të njëjtën sipërfaqe prej 5352.5 m2 me një dizajn që plotëson standardet kombëtare në fuqi, por në të njëjtën kohë ato ndërkombëtare. Vizioni i dizajnit arkitektonik dhe urban bazohet kryesisht në ruajtjen e identitetit të zonës ku koncepti merr frymëzimin e tij, duke integruar  ndërtesën me natyrën si funksionalisht ashtu edhe estetikisht. Tre materialet kryesore çeliku, tulla dhe betoni integrojnë ndërtesën me kontekstin e saj industrial. Gjithashtu gjatë procesit të zgjidhjes arkitektonike është konsideruar ruajtja e gjelbërimit ekzistues kryesisht në perimetër. Gjithashtu modeli i tullës në fasadë, paraqet dinamizmin e shkollës duke zbutur lëvizjen e nxënësve që theksohet fuqishëm nga hija e dritës së diellit. Duke analizuar kushtet urbane dhe mjedisore, si dhe duke ruajtur identitetin e zonës, forma gjeometrike "U" e zgjedhur, krijon mundësinë e zhvillimit të një oborri të brendshëm dhe krijimit të sa më shumë ambienteve që përdorin dritën natyrale dhe ajrosjen në pjesën më të madhe të ditës, duke siguruar komoditet të nivelit të lartë.

Skema funksionale me formë "U" fton në një oborr të brendshëm i cili përdoret për aktivitete sportive në natyrë si futboll, tenis dhe vrap. Shkolla është e ndarë në dy godina kryesore parashkollore-shkollë fillore dhe shkollë të mesme, të cilat janë të lidhura së bashku. Shkolla ka dy hyrje kryesore me hollin e tyre i cili bën ndarjen e flukseve. Fëmijët në shkollën parashkollore dhe fillore hyjnë veçmas nga nxënësit e shkollës së mesme. Në katet më lartë ata mund të shkëmbehen me njëri-tjetrin nëse nevojitet. Shkolla ka një auditor me rreth 180 vende, tetë laboratorë, një bibliotekë dhe një dhomë për aktivitete të ndryshme (zona ngrënies ose vend për të punuar). Shkolla do të shërbejë jo vetëm për 1200 nxënësit e saj por do të jetë e hapur edhe për komunitetin.

Kjo shkollë do të jetë një pikë referimi në qytetin e Tiranës, jo vetëm për projektimin, por edhe për punimet e ndërtimit. Sfida kryesore strukturore ishte përdorimi i pllakave post-tension, një risi në ndërtim në këtë vend për institucionet arsimore. Punimet e ndërtimit përfshinin një strukturë të re për objektin duke filluar nga themeli deri në majë.