Shkolla dhe Kopshti Demokracia

Shkolla dhe Kopshti “Demokracia” ndodhet në Valias dhe iu nënshtrua një rikonstruksioni të plotë. Propozimi përfshin ndarjen e funksioneve kryesore në objekte të ndara që janë të lidhura përmes korridoreve.

Kopshti është një ndërtesë dy-katëshe që e hasim në hyrje të pronës. Kopshti përbëhet nga një vëllim i thjeshtë kuboid, me dritare që alternohen nga kati në kat duke imituar një tabelë shahu në mënyrën e shpërndarjes së tyre. Ndërtesa e shkollës ndodhet pranë kopshtit, duke u shtrirë përgjatë pronës, dhe është projektuar për një kapacitet prej 500 nxënësish.

Shpërndarja funksionale e planimetrive mbetet e pandryshuar midis kateve, me shkallët të vendosura në sallën kryesore të hyrjes dhe një korridor me klasa të vendosura vetëm në njërën anë të tij. Fasada e ndërtesës kryesore ka një arkitekturë të thjeshtë me dritare që shtrihen nga dyshemeja deri në tavan, të vendosura në distanca të barabarta nga njëra-tjetra, me hijezim prej betoni që shtrihet deri në 50 cm jashtë perimetrit të fasadës.

Ndërtesa e administratës ndjek të njëjtin stil, ndërsa në bibliotekë, auditor dhe palestër kemi ndryshime në trajtimin volumetrik dhe ndryshime në fasada për t’u përshtatur me funksionet që ato përmbajnë, si dhe për të krijuar momente të brendshme të ndriçimit i cili depërton  përmes çarjeve në tarracë. Ndërtesa e shkollës krijon tre oborre të jashtme në shërbim të hapësirave rekreative të shkollës, njëra prej të cilave është një fushë sportive e jashtme dhe një oborr i jashtëm për kopshtin.