Cityview Apartment

CityView Apartment ndodhet në Tiranë në një nga kryqëzimet kryesore të rrugës së “Myslym Shyri”. Apartamenti ndodhet në katin e fundit të një ndërtese të lartë të përbërë nga 11 kate, me pamjet kryesore të pozicionuara në drejtim të jugut. Kjo lejon që apartamenti të ketë dritë të bollshme natyrale nga jugu dhe një pamje të qytetit.

Apartamenti ka një konfigurim 3+1 me 2 banjo. Hapësira kryesore është zona e ndenjes, kuzhinës dhe ngrenies të cilat propozohen si një plan open space, duke ndjekur shpërndarjen ekzistuese funksionale të banesës.

Diferenca kryesore midis planit ekzistues dhe atij të propozuar, është qe plani ekzistues ka një konfigurim 2+1, që do të thotë që propozimi ynë shton një dhomë gjumi shtesë, duke shpërndarë hapësirat në një mënyrë të tillë që ato të jenë funksionale dhe me hapësirë të mjaftueshme për të kryer të gjitha aktivitetet qe kërkohen nga klienti.

Hapësira e ndenjes plotësohet gjithashtu me një zonë studimi në të cilën është propozuar një bibliotekë dhe një kënd studimi, një dhomë gjumi master që ka një tualet personal, dy dhoma gjumi fëmijësh, banjo e përbashkët dhe dy ballkone, njëra prej të cilave ka pamje në jug dhe tjetra në lindje.