Vilë Individuale Vuno

Vila shtrihet në Jug të Shqipërisë, në fshatin Vuno. Që në hapat e parë të projektimit është vendosur të ruhet tipologjia e vilave dhe e ndërtimit në fshat. Ndërtimi me gur, dritaret drejtkëndore dhe me hark në pjesën e hollit, si dhe grilat e drurit veneciane, janë integruar me stilin “rustic” në interier. Muret e gurit janë ndërtuar të tillë që dhe në interier dhe në eksterier të jenë të gdhendur dhe të skalitur në mënyrë që të bëhen pjesë e dekorit dhe dizajnit.

Hap pas hapi, në çdo fazë të projektit u mendua nga ana e klientit dhe e APPA Architects që te vila në Vuno të ndërthureshin detaje të tipologjisë së vilave në Mykonos, Greqi me parapetet e harkuar me suva si dhe të përdorej xhami për vetitë që ka si material. Pamja panoramike ishte kusht për t’u ruajtur nga çdo cep i objektit, prandaj dhe xhami ishte zgjidhja ideale.

Dyshemetë e shtruara në verandë janë 2 lloje:

• Me mozaik, ku ndërthuren 2 materiale, tullë qeramike e marrë në Toskanë dhe gur i punuar vendas.
• Dyshemeja e dytë, e cila përkon si tarraca e tretë në objekt, është e shtruar me parket kuadratik në mënyrë që t’i japi ambientit një prekje rustic. Në perimetër të parketit, 15cm gjerësi është rrethuar me gurë dekorativ të bardhë që bëjnë lidhjen e parapetit me suva të bardhë me dyshemenë parket.

Fasada, në sipërfaqen më të madhe, është tipologji e vilave përreth ku 2 faqet lindore dhe perëndimore janë trajtuar me gurë të zhveshur dhe suva.