Vanto Showroom

Vanto është një projekt, i cili i dedikohet produkteve të një cilësie dhe dizajni elitar. Ndaj që në detyrën e projektimit, pritshmëritë ishin për realizimin e një eksperience krejtësisht ndryshe dhe jo të jetuar më parë. Pikërisht për këtë arsye, Vanto është e kundërta e një showroomi klasik me produkte të cilat të vendosura në rradhë identifikohen me vështirësi nga njëra tjetra.

Koncepti i projektit nis me zhvillimin planimetrik, i cili devijon nga skema klasike e një vitrine paralele me ekspozitorin e xhamit. Planimetria dominohet nga një aks diagonal, i cili ndan vitrinën nga interieri në hapësira të cilat respektojnë shumë pak këndet e drejta. Ky aks diagonal përkthehet edhe në materialet e përzgjedhura për këtë projekt. Për trajtimin e dyshemesë, në zonën e vitrinës është përdorur rezinë me efekt mozaiku, baza e të cilit ka tonalitete të kuqërremtë, ndërsa pjesa tjetër është trajtuar me rezinë me efekt betoni.

Në krijimin e efektit skenik të hapësirave të mëdha,  ka ndikuar dhe lartësia e konsiderueshme e hapësirës, e cila theksohet më tepër nga tavani industrial. Edhe pse të gjithë elementët e kondicionimit dhe të ndriçimit janë të ekspozuar, trajtimi i tavanit me tonalitete të lehta, e bën hapësirën të theksojë të gjithë lartësinë e saj.

Për të ekuilibruar minimalizmin dhe pastërtinë e materialeve, nv zonat qendrore janë propozuar disa elementë që e bëjnë hapësirën me të ngrohtv dhe mikpritëse. Prania e basenit ujor, forma organike dhe fluide e tavolinës së takimeve të shpejta, prania e gjelbërimit të integruar nv interier, ekuilibrojnë thjeshtësinë që vihet re në blloqet e pastra të propozuara në perimetër.

Qëllimi i këtij projekti është në krijimin e hapësirave të cilat janë në funksion të plotë të produktit të reklamuar, duke nxjerrë në pah të gjitha karakteristikat e tij. Kjo është bërë duke mos e vendosur produktin në një kuzhinë apo lavanderi klasike, por në një hapësirë të kururar me minimalizëm si një skenë ose vitrinë që ekspozon një “vepër arti”.