The slope House

Shtëpia e Pjerrët, një projekt nga Tharm Architects, ndodhet në fshatin Vrrinë të Durrësit. Objekti është i zhvilluar në 3 nivele të ndryshme, duke shfrytëzuar pjerrësinë e sheshit. Në shesh ndodhet një shtëpi ekzistuese njëkatëshe, sipërfaqen e njollës të së cilës e marrim si referim për objektin e ri që do të ndërtohet. Kësaj sipërfaqeje i shtojmë një kat, duke iu përshtatur kërkesave të familjes.

Për të shmangur pengimin e shikueshmërisë për objektin pas, vëllimi i ri shtyhet drejt kufirit jugor duke krijuar fushëpamje dhe hapësirë të madhe me dy sheshe përpara banesës. E njëjta masë vëllimore tashmë vjen e tërhequr dhe në raporte më elegante.

Rruga hyrëse në objekt furnizon me akses të dy shtëpitë, ndërsa sistemimi është i organizuar në 2 nivele. Mbulesa e objektit është e menduar të vijë në 2 pjerrësi, duke i përngjarë pjerrësisë së relievit. Hyrja kryesore e banesës kryhet në nivelin 0. Korridori na orienton në lindje për në dhomën e gjumit, në perëndim në kuzhinë, ndërsa në jug me nuklin e shkallës që ndërlidh tri nivelet në objekt. Njëkohësisht banesa mund të aksesohet edhe në nivelin -1 nga oborri. Në nivelin -1 ndodhen funksione si zona e ngrënies, salloni i ndenjes, tualeti, depoja dhe garazhi i mbyllur.

E veçantë për zgjidhjen e kësaj shtëpie është se funksioni i gatimit ndodhet në nivelin 0, i cili komunikon vertikalisht me nivelin e poshtëm me anë të një shkalle njërampëshe. Vizualisht, ambientet komunikojnë me anë të atriumit në të cilin zhvillohet salloni. Në nivelin e tretë të banesës kemi dhomën e çiftit me funksione plotësuese si gardërobë, tualet dhe dalje në ballkon.

Tendenca në objekt është për të përdorur materiale sa më natyrale si tullë, llamarinë, xham, shtrim me pllaka guri dhe bari të sistemimit. Objekti vishet me tullë dekorative duke pasur si qëllim nxjerrjen në pah të thjeshtësisë së vëllimit. Vëllimet më të vogla të ballkoneve mbështillen me fletë llamarine, duke u evidentuar nga trupi kryesor edhe me anë të ngjyrës së bardhë. Me të njëjtin parim trajtohen dhe kornizat e dritareve dhe hijezuesve.

Qëllimi i Tharm Architects për projektin Shtëpia e Pjerrët ka qenë dhënia e një ndërhyrjeje sa më minimale në terren si në formë ashtu edhe në materialitet, duke përmbushur kërkesat e klientit për funksionalitetin dhe duke siguruar komfortin dhe ndjenjën e privatësisë.