Galeria e Bregdetit

Në qershor të vitit 2019 Galeria e Bregdetit hapi dyert e saj në jug të Shqipërisë, në Vlorë, pas një viti bashkëpunimi midis Parasite 2.0 dhe kuratorit dhe themeluesit të galerisë Elian Stefa.

Galeria e Bregdetit është projekti i parë i përhershëm që materializon kërkimin mbi Radical Islands, të cilin Parasite 2.0 e ka filluar që në 2014. Këto janë vende atraksioni, emancipimi dhe shprehjes së lirë për jetën dhe habitatin njerëzor.

Brendësia e galerisë është e ndarë në dy pjesë nga një perde holografike. Hapësira e parë e shtyn konceptin e kubit të bardhë në një ekstrem, ku interieri duket krejtësisht i izoluar dhe i largët nga rregullat fizike të eksterierit.

Në anën tjetër të perdes, një hapësirë e ashpër kushtuar banorëve dhe ekspozimit të veprave të artit me përmasa të mëdha u zhvesh plotësisht nga çdo lloj finiture dhe u la “lakuriq”, me në qendër një shesh të zbrazët dhe një seri mobiljesh modulare që mund të sigurojnë mjedise të ndryshme hapësinore.

Hapësira e jashtme, e quajtur “Duna prej Betoni”, është një kopsht dhe hapësirë për shfaqje, e përbërë nga bimë dhe duna artificiale, duke krijuar një hapësirë me shumë nivele ku skena dhe publiku janë të përziera plotësisht dhe vazhdimisht.