“Rossini” restaurant

Ideimi i këtij objekti të pozicionuar në kryqëzimin që lidh Kryeministrinë me godinën e RTSH, është bazuar mbi tre koncepte bazë të interierit: intimiteti, ngrohtësia dhe rrjedhshmëria, të cilat reflektohen në tre ndarjet hapsinore të tij.

Zona e parë me të cilën “ndeshemi” është ajo e verandës, e cila, nëpërmjet gjelberimit në konturin e saj të jashtëm dhe vazove të përmasave relativisht të mëdha, synon të krijojë shkrirjen e zhurmës së ndërveprimeve sociale të qendrës së qytetit me qetësinë e një kopshti.

Pasardhëse të verandës janë dy dyer, njëra prej të cilave të çon në zonën e grumbullimeve private, ndërsa tjetra në hyrjen e restorantit.  Zona privé është e karakterizuar nga elemente të cilët nuk i hasim në përditshmëri, si tavolina e mermerit me funksion “show-cooking” apo separé-ja e harkuar, të balancuar me përdorimin e drurit në mobiljet e tjera dhe trajtimin e murit me stuko të teksturuar. Hapësira më e madhe e ketij objekti mbushet prej restorantit, i cili në vetvete funksionon i ndarë në “ishuj” të cilët luajnë me transparencën dhe intimitetin nëpërmjet materialeve transluçente, mobiljeve masive që krijojnë vrima shikimi ndërmjet produkteve që ekspozojnë si dhe nga pozicionimi i tavolinave në nivele dhe drejtime të variueshme

Përdorimi i harqeve ka për qëllim rrjedhshmërinë jo vetëm në lëvizje por edhe në shikim. Ky i fundit, përveçse në volumetrinë e mobiljeve është i reflektuar edhe në ndriçimin tavanor, për të funksionuar si një udhëzim i lëvizjes në këto ambiente. Në përfundim, qëllimi parësor i dizajnit të këtij restoranti ka qenë të krijojë mundësi për të gjithë gjendjet e përdoruesit të tij, duke mbajtur si konstant vetëm kontrastin në harmoni.