Vila AE

Objektin që e prezantojmë në fakt është një kompozim i përdorimit të formave bazike gjeometrike të cilat janë prezente si në plan ashtu edhe në formën e objektit si trup arkitektonik. Një arkitekturë të tillë shpesh herë e quajnë si arkitekturë minimaliste, por kjo nuk nënkupton varfëri fizike në elementët arkitekturore, por përkundrazi një pasuri shpirtërore që shihet qartë në objektin tonë të emëruar AE House që gjendet në qytetin e Shkupit në lagjen Nerez.

Në interier mbizotëron ngjyra e bardhë, por me shumë kujdes janë përzgjedhur detajet, si për shembull pishina me dyshemenë prej xhami që të jep ndjesinë e akuariumit mbi hapësirën e ndejtjes, materialet e përdorura në interier si shprehje e teknologjisë bashkëkohore të ndërtimit me format e rregullta të hapësirave të brendëshme i japin objektit një thjeshtësi maksimale estetike.

Nga jashtë na paraqet një objekt shumë avangard, inovativ veçanërisht në përdorimin e xhamit në fasadë dhe në fundin e pishinës. Sipërfaqet e mëdha të xxhamit e rrisin ndriçimin në brendësinë e objektit, kurse loja e dritës dhe hijes e bën hapësirën e brendshme magjike.