ZINS

Një projekt nga Laago Architects i vendosur në bregun e detit Adriatik në plazhin e Currilave, koncepti arkitektonik i Bar & Restorant Zins lind nga dëshira për të integruar një objekt, i cili me fasadat e pastra por lëvizjet dinamike të volumeve, përshtatet me stilin në ndryshim të qytetit të Durrësit.

Qëllimi kryesor i projektit ishte krijimi i nje hapësire vizualisht të inspiruar nga ngrohtësia mesdhetare. Objekti përbehet nga dy volume kryesore me lartësi të ndryshme, ndërfutja e të cilëve bëhet një element kompozimi  dominant që e orienton lëvizjen dhe hapësirën drejt një aksi virtual që nis në hyrjen e hapësirës, vazhdon përgjatë saj dhe përfundon në det. Hyrja kryesore e veshur me dru, bën kontrastin e kërkuar me pjesën tjetër të fasadës të veshur me gur ,shkëput volumet dhe evidenton hyrjen.

Përzgjedhja e materialeve natyrale si druri, guri, përdorimi i ngjyrave të tokës, transmetojnë ngrohtësi, ndjesine e thjeshtësisë dhe bëhen një me tonet e natyrës përreth.

Fasada e pastër, gati hermetike që zhvillohet përgjate rrugës, ndërpritet nga hapjet e ngushta vertikale të dritareve dhe qendron diskrete përballë kaosit të qytetit. Në kontrast fasada përendimore që përballet me detin ,hapet me vetrata të mëdha xhami dhe mbush interierin me dritë dhe reflekton ngjyrat e detit vazhdimisht në ndryshim në momente të ndryshme të ditës.

Dëshira për të krijuar një hapësirë organike që perceptohet brënda dhe jashtë si një hapësirë e vetme, solli përdorimin e gjerë të elementit të gjelbërimit si dhe njëtrajtshmëri në trajtimin e materialeve të veshjeve dhe shtrimit . Veshja me dru e tavanit , trarët e drurit me ndricim të fshehtë ,litarët ku është  inkorporuar ndricimi dekorativ , të gjithë këto elementë evokojnë temën e “varkës’’.

Ky objekt, edhe pse i një shkalle të vogël është kthyer në një ambient ftues dhe tërheqes jo vetëm për banorët e qytetit por dhe për vizitorët e tij.