TRENDET E KUZHINËS ME NGJYRA PËR VITIN 2021

Guxoni me krijimtari!

Një trend i madh mund të konsiderohet kuzhina shumëngjyrëshe. Ndërsa po kalojmë më shumë kohë brenda ‘katër mureve’ prej disa kohësh tashmë, 2021 ka të bëjë me ndërmarrjen e rreziqeve në interiere, krijimin e një ambienti të ri të ndryshëm, kërkimin e ngjyrave që përmirësojnë humorin tonë, duke eksperimentuar dhe futur nuanca të reja, më të guximshme, që sjellin kuzhinën në jetë.

Kuzhina është një vend kryesor për të pasur disa përzierje dhe përputhje ngjyrash për të krijuar energji pozitive. Krijoni një kuzhinë të gjallë duke përdorur ngjyra të freskëta, të pastra dhe të ndritshme. Por, shtimi i ngjyrës në ambientet tuaja nuk do të thotë domosdoshmërisht nuanca të ndritshme. Ngjyrat e lehta janë gjithashtu të njohura për krijimin e një atmosfere qetësuese në të cilën mund të gjeni komoditetin dhe stilin.

Shumica e kuzhinave kanë hapësirë ​​minimale në mur, kështu që mund të konsiderohet një vend i mirë për të vendosur një ngjyrë të theksuar, pa e ekzagjeruar. Por nga ana tjetër, kuzhinat janë plot me mundësi ngjyrash, nga dyshemeja deri te tavanet, pajisjet dhe dollapët. Kjo është arsyeja pse nuk duhet ta keni të vështirë të ndryshoni atmosferën hapësinore, pa shkuar ‘tepër’. Këtu do të gjeni disa nga tendencat e ngjyrave për kuzhinën tuaj dhe si t'i zbatoni ato.

Trendet e ngjyrave për një kuzhinë shumëngjyrëshe

Blu – nuancat e ngjyrës blu, qoftë blu pastel; blu e thellë; blu e errët; etj. do të vazhdojnë të jenë një trend i madh për zgjedhjet e kabineteve të kuzhinës. Bluja ka qenë një trend së fundmi, zgjedhja më e sofistikuar dhe dramatike e ngjyrave kur bëhet fjalë për kuzhinat. Ndërsa pamjet me kontrast të lartë fitojnë popullaritet, bluja hyn në lojë, pasi siguron kontrastin e nevojshëm dhe gjithashtu një pamje të shkëlqyeshme.

E gjelbër – nuancat e ngjyrës së gjelbër, qoftë e gjelbër e zbehtë; smerald; ulliri; një përzierje e blusë dhe të gjelbrës; etj.. Prisni ta shihni ngjyrën e gjelbër në kuzhina, më tepër në formën e pllakave dhe kabineteve. E gjelbra mund të jetë po aq dramatike dhe luksoze kur përdoret në kuzhinë. Tonet e gjelbra mund të jenë më të zbehta në ditët e sotme, por është e qartë se familja e kësaj ngjyre do të jetë trend për një kohë të gjatë.

E verdha - e verdha është një ngjyrë e njohur për kuzhinat dhe mund të jetë zgjedhja më e lehtë për këdo që mendon të shtojë ngjyra në kuzhinën e tij. Është një ngjyrë primare e klasifikuar brenda ngjyrave të ngrohta, në nuanca të shumëfishta dhe të gjitha kombinohen në mënyrë perfekte, duke transmetuar ngrohtësi dhe gëzim. Ngjyra të gjalla si e verdha krijojnë mjedise veçanërisht mikpritëse. Zgjidhni një të verdhë që është e pastër dhe e ndritshme, por gjithashtu mjaft e ngrohtë.

Roza - kjo ngjyrë është simpatike dhe stimuluese, dhe një kuzhinë do të ndihej komode në të. Sigurisht, duhet të shmangni ngjyrat e panevojshme të ndritshme, por nuanca të qeta dhe të gëzueshme do të krijojnë një atmosferë jashtëzakonisht elegante.

E kuqja - E kuqja është ngjyrë befasuese për kuzhinat, por ka një gamë të tërë nuancash dhe finiturash të disponueshme, kështu që përdoreni të kuqen në skemën tuaj të ngjyrave pa u ndjerë të 'tepërt'. Nuancat e kuqe mund të duken të frikshme në kuzhinë, por një e kuqe e heshtur është kombinimi perfekt i stilit dhe komoditetit. Ju mund të eksperimentoni me këtë ngjyrë të guximshme pa qenë e ekzagjeruar.

Si të përdorni ngjyrat në kuzhinë

• Dollapë me ngjyra - Dollapët e kuzhinës po bëhen më të gjallë duke i'u dhënë atyre ngjyrë, një trend i ditëve të sotme. Njerëzit po bëhen më të guximshëm kur bëhet fjalë për të shtuar ngjyra në kuzhinat e tyre. Dollapët me tone të lehta po dominojnë trendin e këtij viti dhe nuancat e blusë dhe jeshiles janë në rritje.

• Dollapë me dy tone - Harrojeni kombinimin e një ngjyre të vetme, tendenca për të kombinuar dy ngjyra në kabinetet e kuzhinës është rritur këtë vit. Kuzhinat me dy tone po fitojnë shpejt popullaritet, veçanërisht kabinetet në dy ngjyra të ndryshme. Lërini dollapët e unifikuar të jenë pjesë e së kaluarës dhe mos ngurroni të përzieni ngjyra.

• Banakë shumëngjyrësh – banaku i kuzhinës me ngjyrë ju ndihmon të shtoni personalitet në kuzhinën tuaj. Pra, nëse doni t’i përmbaheni neutraleve në mure dhe dollapë, zgjidhni një banak me ngjyrë, një nuancë të shndritshme për ta bërë atë të dallohet. Ju mund ta koordinoni atë me elementë të tjerë ose edhe vetëm banakun për të krijuar një paraqitje interesante në dizajnin e kuzhinës tuaj.

• Ngjyrat në panelin e pllakave – kjo është një nga zgjedhjet më të rëndësishme të dizajnit që mund të bëni. Shtoni ngjyra befasuese në kuzhinë dhe krijoni diçka artistike. Një nga tendencat përfshin ngjyra të theksuara ose letër murale me printe të ndryshme. Ju mund të përdorni blu, jeshile, të kuqe ose të verdhë, duke e bërë kuzhinën të ndjehet si një vend i lumtur, por edhe i freskët dhe relaksues. Nëse ndiheni krijues, kombinoni dy ose tre ngjyra për një tipar më të bukur. Mos ngurroni të vendosni pllaka deri në tavan për ta bërë atë edhe më të guximshëm.

• Raftet e hapura dhe muret me ngjyra - Raftet e hapura janë në rritje, duke ju lejuar të shfaqni artikujt tuaj si dekor. Ato kanë qenë veçanërisht të njohura në kuzhinat e shtëpive në ferma, si dhe kuzhinat në stil industrial. Dhe do të vazhdojnë të jenë një trend, nëse nuk jeni adhurues i madh i dollapëve nga dyshemeja në tavan. Ju mund të përdorni ngjyra në mure, nëse përpiqeni të shmangni "ekzagjerimet" me dollapët me ngjyra ose pllakat. Shtimi i ngjyrës është mënyra më e mirë për të ndryshuar gjërat në kuzhinë - pa rinovim, pa ndërtim, thjesht lyeni muret. Diçka me të vërtetë e këndshme do të ishte ngjyra e ndritshme në tavan ose në murin e 5-të, nëse nuk keni frikë të guxoni me ngjyra ose letër murale, për të një shtuar ndjesi dramatike në hapësirën tuaj.

• Pajisjet me ngjyra – kur projektoni një kuzhinë, mendimet e para shkojnë te dollapët dhe pllakat, pasi këto elemente mund të dominojnë hapësirën. Por, kjo nuk do të thotë që duhet të injoroni pajisjet e kuzhinës. Ngjyrat në vendet më të papritura, si një frigorifer ose sobë, mund të kenë një ndikim të madh. Në kohët e fundit, markat si SMEG, kryesisht të njohura për pajisjet e frymëzuara nga stili retro, kanë dalë në treg duke ofruar një perspektivë të re jashtë normës. Pra, pse të mos provoni t'i shtoni më shumë jetë kuzhinës tuaj me pajisje shumëngjyrëshe.

• Mobilje dhe aksesorë shumëngjyrëshe – Nuk ka rregulla kur zgjidhni ngjyrat për kuzhinën, por është e rëndësishme ti kombinoni ato. Nëse jeni për një kuzhinë njëngjyrëshe dhe nuk guxoni të vendosni një ngjyrë të fortë në muret ose pajisjet tuaja, ju mund t'i jepni kuzhinës tuaj një injeksion me ngjyra përmes mobiljeve dhe aksesorëve, si në karrige ose stol, pëlhura, ndriçuesë ose vepra arti. Rezultati është një kuzhinë shumë moderne. Një ngjyrë e gjallë e bën kuzhinën shumë të gëzuar, kështu që ju mund të zgjidhni nuanca më intensive siç janë portokallia, e verdha, roza e fortë dhe e kuqja.

Source: idealhome.co.uk; newdecortrends.com; housebeautiful.com; goodhousekeeping.com; thespruce.com