Studio Muzikore

Projekti i kësaj studio muzikore nga De.studio architects ishte një sfidë jo vetëm në konceptimin vizual, por edhe në realizimin e tij.

Projekti është konceptuar mbi bazën e krijimit të një atmosfere interesante dritash dhe ngjyrash ndërthurur me objektet e arredimit shumë të thjeshta morfologjikisht dhe nga ana kromike. Kjo është realizuar duke u nisur nga studimi i pajisjeve fonike dhe paneleve akustike, të cilat janë shumë teknike. Qëllimi ishte krijimi i një ambienti frymëzues dhe ngacmues për krijimtarinë artistike për të cilën shërben ambienti.

Realizimi i kësaj atmosfere është krijuar nëpërmjet përdorimit të dritave LED të cilat ndryshojnë ngjyrë dhe në plotësim të ambientit monokromatik, i japin projektit gjallëri dhe mundësinë për të ndryshuar shpeshherë.

Një vëmëndje shumë e veçantë i ështe dhënë akustikës. Të gjithë panelet janë të realizuara me porosi ose të blera në kompani të rëndësishme botërore, të specializuara në prodhimin e tyre.

Ambienti është ndarë konceptualisht në dy pjesë, atë teknik të postproduksionit dhe në një zonë relaksi. Në zonën e relaksit i është kushtuar vëmëndje dizajnit të logos si dhe historikut të diskografisë së studios.

Përveç trajtimit të mureve, në këtë studio muzikore, De.studio architects i ka kushtuar vëmëndje të veçantë izolimit të gjithë objektit si dhe trajtimit të tavanit me materiale të posaçme akustike. Përsa i përket dyshemesë, është zgjedhur të përdoret moketi, duke qenë që ndihmon në thithjen e tingujve dhe nuk krijon zhurma në rast se ndodhen më shumë persona në studio. Janë përdorur materiale zëizoluese jo vetëm në prodhimin e dyerve, por edhe në veshjen e tyre të jashtme.

Zgjedhja e përdorimit të disa lloj materialesh zëizoluese u realizua për të krijuar konceptin e një larmishmërie në formë dhe funksion.