SHTËPIA PRIVATE

Shtëpia Private nga Archistudio është ndërtuar në qytetin e Vlorës, në fundin e një shpati të pjerrët malor, mes bimësisë karakteristike të zonës, duke zbritur fare pranë rrugës së rivierës dhe vijës bregdetare.

Dizajni i projektit lindi natyrshëm, duke ndjekur kufizimin dhe pamundësinë e shtrirjes së pronës, karakteristikat e vendit dhe topografinë.

Ndërtimi u pozicionua në platformën më të balancuar të terrenit, por edhe në hapjen më të privilegjuar të peizazhit, duke përfituar pjerrësinë e skarpatit në veri, me projektimin e një diafragme nëntokësore në mbrojtje të rrëshkitjeve të terrenit shkëmbor.

Vila është konceptuar si një strukturë sa e ngurtë po aq minimaliste, me plane të lëvizshme të hapura, si dhe të ndërfutura nëntokë, mbulesa të përshkallëzuara dhe të thyera në lidhje, të cilat krijojnë shkrirje në vazhdimësi me mjedisin natyror dhe gjelbërimin.

Një faktor tjetër që vlen të përmendet është se janë minimizuar elementet dekorative. Imazhi i siguruar nga volumet dhe këndet e plota të mbulesave, brisoleve vertikale, dritëhijet e hedhura gjatë ditës dhe hënës gjatë natës, në veshjen e betonizuar, funksionojnë si dekori kryesor i vilës.

Epitomizimi i mjedisit natyror propagandon arkitekturë më diskrete, më racionale, kjo në vëmëndjen tonë, thjeshtëzon formën duke vlerësuar hapësirën funksionale si brenda dhe jashtë, dritën, kontrastet, transparencën dhe të natyrshmen në teknikën e ndërtimit apo materiale.

Koncepti hapësinor është i lidhur me të gjitha këto karakteristika, veçanërisht me materialet dhe dritën.

Është përzgjedhur një material i ngurtë si betoni, për të theksuar gjeometrinë dhe shfaqjen vëllimore të objektit, çka ndikon dhe në formimin e hapësirave të brendshme. Në të njëjtën kohë, çeliku dhe druri balancojnë dhe diferencojnë marrdhëniet e volumeve, linjave dhe peshën e materialeve në tërësi.

Shtëpia Private nga Archistudio është e organizuar vizualisht në dy volume kryesore, në një dhe dy kate mbi tokë.

Dhe pse banesa mbetet një hapësirë shumë personale, ku përzihen funksionet jetike brenda dhe jashtë saj, qëndrueshmëria lidhet veçanërisht me aspekte pasive, që kanë të bëjnë me ndërgjegjësimin mbi vlerësimin e natyrës.

Tarraca e shfrytëzuar dhe e gjelbëruar me bimë karakteristike mesdhetare, si lavandër e trumzë, e aksesuar nga ashensori transparent, është bërë pjesë e një ekosistemi natyror të gjetur dhe të kultivuar aty.

Zona  e ditës me lartësi të dyfishtë vijon sipas një lëvizshmërie fluide në plan gjithashtu, ku një ndër elementët më të rëndësishëm të ridimensionimit të saj është mënyra si ndërhyn drita natyrale.

Ndriçimi natyral subjektivisht i mundëson volumit të ristrukturohet, përms intersektimit të tij shumë dimensional, mes thyerjeve dhe kontrasteve që drita krijon.

Mjediset e shërbimit zhvillohen në katin nëntokë dhe në katin përdhe, ndërsa zona e natës në katin e dytë lidhet me tarraca dhe plane me skarptin e pjerrët të malit në veri, duke u shkrirë me të.