NË VËMENDJE: MADEN GROUP

Në mënyrë që t’i ofronin arkitekturës së Kosovës një studio unike e cila të fal komfort, të mbush me ndjesi miqësore dhe punon me krijimtari, arkitekti i talentuar Ideal Vejsa së bashku me inxhinerin Memli Dushi, vendosën të hapin në 2009 studion tashmë të shumënjohur, Maden Group, me seli në Prishtinë.

Maden Group gjithmonë përpiqet të integrojë elementë të rinj në projektim sipas evolucionit të teknologjisë dhe materialeve, duke u dhënë dimensione dhe ngjyra të ndryshme krijimeve të tyre, por duke mos e humbur kurrë identitetin e tyre, një karakteristikë kjo që përfaqëson secilin prej projekteve të studios.

Me një ekip prej 15 personash, midis tyre dhe partnerët Gazmend Dema dhe Rashit Zeneli, – vëmendja kryesore e studios është mjedisi dhe atmosfera ku ata punojnë. “Me qëllim që të rifreskojmë punën që ne bëjmë, herë pas here ne e transformojmë vendin tonë të punës për të shmangur monotoninë dhe krijojmë një mjedis krijues. Kjo ka dhënë rezultate të mahnitshme në punën tonë dhe gjithashtu ka rritur dashurinë dhe miqësinë në ekipin tonë.” – thotë arkitekti Vejsa.

Qasja e Maden Group në punë dhe projektim, krijon një themel të fortë për studion, duke rezultuar në projekte të suksesshme, të nderuara me çmime kombëtare dhe ndërkombëtare.

HIGHLIGHT: MADEN GROUP — Maden Group Office

Zyrat e Gjirafa.Biz, Prishtinë, Kosovë, 2016

Si një vazhdimësi e zyrave Gjirafa.com, projekti Gjirafa.Biz është konceptuar në harmoni me to, por me një ndryshim: ambienti i krijuar duhet të përcjellë një ndjenjë serioze dhe profesionale në kontrast me zyrat më miqësore të Gjirafa.com. Hyrja u projektua për të krijuar një përshtypje unike dhe pastërtie, duke përdorur fuqinë e ngjyrës së zezë në korridorin kryesor. Për të krijuar një lidhje vizuale midis dy hapësirave të Gjirafa.com dhe Gjirafa.biz, një nga muret është mbuluar me një plan kontenieri në ngjyrë portokalli të përdorur edhe në ambientet e zyrave të para, element që mund ta shikoni në shumë prej projekteve të studios.

Hostel Mami, Prishtinë, Kosovë, 2018

Në këtë projekt, Maden Group ka kombinuar traditat me frymën bashkëkohore për të krijuar një “arkitekturë lozonjare”. Ajo çka e bën Hostel Mami të veçantë është përdorimi i elementeve tradicionale – një koncept që e shohim shpesh në projektet e Maden Group – si sofra, fyelli, çiftelia, etj., të trajtuara në një mënyrë shpirtërore ndryshe, në formën e një ekspozite arti, duke i dhënë turistëve të huaj mundësinë për të mësuar dhe për t’u njohur me traditat shqiptare.

Shkolla Amerikane e Kosovës, Shkabaj, Kosovë, 2018

“Shkolla Amerikane e Kosovës” është ndoshta një nga punët që përfaqëson më së miri Maden Group. Projekti konsiston në një gjimnaz dhe kopsht, i cili ka në qendër fëmijët dhe adoleshentët. Përveç organizimit hapsinor, rëndësi i është kushtuar funksionalitetit dhe ndikimit që kanë këto hapësira te nxënësit. Bazuar në këtë koncept, arkitektët projektuan hapësira multifunksionale ku zhvillohen shumë qëllime në një vend. Ndriçimi natyror në secilën hapësirë, shumëllojshmëria e ngjyrave dhe përfshirja e gjelbërimit në interier, janë disa nga komponentët që karakterizojnë kampusin e ri të Shkollës Amerikane të Kosovës.

Metalic Club, Gjakovë, Kosovë, 2019

Në shumë nga projektet e Maden Group mund ta vëmë re qasjen e tyre drejt tradicionales dhe ruajtjen e lidhjes me të shkuarën. Edhe për Metalic Club ky ishte koncepti: të ruhet e vjetra, ndërkohë që e reja duhet të duket me ngjyra. Projekti karakterizohet nga një qasje që përpiqet të kontekstualizojë arkitekturën bashkëkohore brenda një ambienti tipik modernist të shekullit të kaluar. Ai paraqet një ndërhyrje brenda njërës prej ndërtesave më të mëdha industriale të Kosovës (fabrika Metalike, Gjakovë), e cila njëkohësisht është shënuese e një faze të rëndësishme të zhvillimit urban-arkitektural në vend. Koncepti bazohet në faktin se çdo ndërhyrje e re duhet t’i përshtatet arkitekturës së trashëguar, pa e dëmtuar dhe hequr atë nga tiparet e saj stilistike. Një pjesë e konsiderueshme e ndërtesës janë ruajtur, duke mos ndërhyrë aspak në to, ndërsa çdo ndërhyrje e re është trajtuar me ngjyra në mënyrë të detajuar, për t’u vlerësuar si një shtresë e rëndësishme e kohës së tanishme.

Shtëpia në Kodër, Ulqin, Mal i Zi, 2019

Që nga fillimi i projektit, ajo që ishte e rëndësishme për studion ishte të projektonin një vilë që duhej të kontekstualizohej me zonën në mënyrë që shtëpia të shtrihej dhe të vendosej brenda kufijve të saj. Duke integruar shtëpinë me terrenin dhe duke trajtuar detajet të cilët rrisin cilësinë e mjedisit, ky dizajn i pozicionuar dhe i zhvilluar me kujdes krijon një ambient të jashtëm të kuruar në një territor sfidues. Projekti u ndikua nga arkitektura e vilave të panumërta që gjenden në vijën bregdetare të Ulqinit. “Shtëpia në Kodër” nisi me forma të pastra gjeometrike dhe më pas u manipulua dhe modernizua për të përfituar nga pamjet mbreslënëse që ofronte deti, duke rezultuar në një arkitekturë tipike mesdhetare.

Shtëpia Francis, Prishtinë, Kosovë, 2020

Ky projekt konsiston në rinovimin e një shtëpie ekzistuese, problemi më i madh i të cilës ishte mungesa e identitetit. Transformimi i saj filloi me heqjen e disa elementeve ekzistues në fasadë, duke rezultuar në vëllime të pastra kubash të bardhë për t’u përpunuar. Me përdorimin e një ngjyre të ndritshme portokalli, arkitektët arritën t’i jepnin shtëpisë vëmëndjen e duhur. Një ekran me kube modulare – që përbën dhe elementin kyç arkitektonik të ndërtesës – mundëson intimitetin e nevojshëm në ballkon, duke lejuar njëkohësisht depërtimin e rrezeve të diellit. Ndryshe nga fasada, arkitektura e brendshme e shtëpisë karakterizohet nga një stil minimalist me qëllim që hapësira të ruaj qetësinë e saj.

HEB’S Bar & Restorant, Prishtinë, Kosovë, 2020

Tiparet kryesore që Maden Group i ka kushtuar vëmendje në projektin Heb’s ishte komoditeti, pamja e veçantë dhe ndjenja “si në shtëpi”. Duke qenë se sot, restorantet dhe baret janë transformuar nga hapësira ku njeriu thjesht shkon për të ngrënë në hapësira krijuese dhe të bukura, arkitektët përdorën element që do ta veçonin këtë restorant nga të tjerët, të tilla si tullat e xhamit për t’i dhënë ambientit një ndjesi bollëku, si dhe gjelbërimi i brendshëm për ta bërë atë sa më të rehatshëm dhe natyral.