ARKITEKTURA NË PASARELAT E MODËS

Moda dhe arkitektura kanë pasur gjithmonë një marrëdhënie të ngushtë, madje modelet e guximshme të realizuara nga Frank Gehry dhe Zaha Hadid shpesh mund të shihen të rikrijuara në pasarela. Chanel, Dior, Louis Vuitton dhe marka të tjera luksoze kanë organizuar shfaqje në vende të pabesueshme në të gjithë botën, nga atraksionet e famshme në Nju Jork, Paris, Londër dhe Milano në vende më pak të njohura në Brazil, Kaliforni apo Kore. Dizajnerët përdorin si skenë ndërtesa ikonike për të mbajtur një qëndrim politik, për t’iu referuar historisë, ose thjesht për të krijuar një background për koleksionet e tyre, duke provuar se ndonjëherë shfaqja më e madhe mund të bëhet pa fjalë. Këtu janë disa nga ndërtesat më të rëndësishme në të gjithë botën në të cilat janë mbajtur shfaqje mode të ngritura mbi skena arkitektonike ikonike.

Palais Bulles

“Pallati i flluskave” i Pierre Cardin u përdor si sfond për koleksionin e Dior Cruise 2016. Shtëpia legjendare me pamje nga deti Mesdhe në Jug të Francës u projektua nga arkitekti hungarez Antti Lovag dhe u ndërtua midis 1975 dhe 1989. Ajo u realizua për një industrialist francez dhe u ble më vonë nga stilisti Pierre Cardin si një shtëpi pushimi.

Muzeu i Artit Bashkëkohor Niterói

Muzeu është projektuar nga Oscar Neimeyer si një pikë referimi në Rio de Janeiro, i cili qëndron mbi një shkëmb me pamje nga deti. Louis Vuitton zgjodhi këtë ndërtesë moderne në formë pjate si pasarelë për shfaqjen e tij Cruise 2017.

Grand Palais

E vendosur në Champs-Élysées, meka historike e blerjeve në Paris, salla e ekspozitave Grand Palais ishte e preferuara e Karl Lagerfeld. Drejtori krijues e ka shndërruar hapësirën e madhe në tema të ndryshme: si terminal aeroporti (2016 Couture), dyqan ushqimesh (Vjeshtë / Dimër 2014) dhe karnaval (Vjeshtë 2008 Ready-to-Wear),etj.. Për shfaqjen Spring Summer 2019, Grand Palais u shndërrua në një plazh ëndërrimtar. Sidoqoftë, pasarela “në çati” e Chanel për shfaqjen SS2020 është e preferuara jonë, ku arkitektura dhe moda në këtë skenë nuk mund të ndahen nga njëra-tjetra.

Parku Qendror, New York

Për të debutuar koleksionin Polo Pranverë 2015 për femra, Ralph Lauren krijoi një event të papritur në zemër të Parkut Qendror në Nju Jork, të prezantuar si një show me shfaqje holografike 4D. Shfaqja përdor një sipërfaqe ujore në Parkun Qendror të Manhatanit për të projektuar modelet që ecin mbi pamjet holografike në sfond, duke sjell kështu së bashku veshjen, artin dhe teknologjinë.

Fontana di Trevi, Rome

FENDI organizoi një event spektakolar në Romë – dhe vulosi, edhe një herë, lidhjen e tij të thellë dhe afatgjatë me Romën, duke zgjedhur kështu qytetin e tij të lindjes për të festuar 90 vjetorin e markës. Karl Lagerfeld mori çdo gjë në dorë duke transformuar shatërvanin ikonik Trevi në Romë me një pistë eterike, të tejdukshme që krijonte iluzionin sikur modelet ecnin mbi ujë.

Prada Fashion House

Prada bashkëpunoi me AMO (studioja paralele e dizajnit e OMA – Rem Koolhaas) për shfaqjen e saj Pranverë / Verë 2019, duke krijuar një skenë që është elegante nga pikëpamja industriale me një prekje psikedelike. E vendosur brenda ambienteve të vet shtëpisë së modës në Milano, hapësira e ekspozitës trajtohet si një fushë arkitektonike e ndarë në një seri sheshesh të etiketuar me koordinata gjeografike që përcaktojnë pozicionimin e të ftuarve në shfaqje.

Savage x Fenty në Barclay’s Center, New York

Ashtu si çdo gjë që Rihanna bën, shfaqja e saj e vitit 2019 ishte më shumë se një spektakël. Këngëtarja dhe stilistja mori përsipër Qendrën Barclays në Brooklyn dhe e ktheu atë në një përvojë krejtësisht gjithëpërfshirëse, të kompletuar me vallëzim dhe muzikë që e sollën në jetë dizajnin. Ngjarja zbuloi një shfaqje bashkëkohore në stilin burlesque, ku modelet qëndronin në platforma të bardha me lartësi të ndryshme dhe me harqe.